Busuak Hati
Penulis: Fina Rahmadani
Mahasiswa Sastra Minangkabau Fakultas Ilmu Budaya Universitas Andalas
Sajak nambai adolah tigo urang sakawan nan banamo ayu, dani, jo linda. Anak urang ko alah bakawan dari samaso ketek lai, katiko masuak sakolah SD inyo alah bakawan batigo. Samaso kelas satu SD hubungan nak urang elok-elok sajo nyo, sampai kelas limo SD. Katiko alah masuak kelas anam alah ado nan babeda dari ayu. Tanggal 17 Agustus urang akan ma adokan acara pawai, acara ko di ikuik an dek anak-anak dari SD, SMP, sampai SMA. Dani jo Linda ikuik dalam acara tu, mambaok alat musik Lira namonyo, Sadangkan ayu mamainkan alat musik pionika. Ayu maraso alah kanai pisah an dek dani jo linda. Katiko latihan untuak acara pawai tu dani talambek tibo, katiko alah tibo kironyo Lira nan biaso di main an dek dani alah dipakai ayu, disinan dani mangiro mungkin ayu nio mancubo mamainkan Lira pulo, dani masuak ka barisan manggantian ayu main pionika. Alah sampai di per tangahan latihan ayu ko indak juo mambaliak an Lira Dani do, dani ko mamintak ka ayu untuak baganti. Tapi kironyo ayu ndak namuah. Dani pun berang, inyo kecek an ka guru nyo kalau ayu alah ma ambiak Lira nyo. Ayu alah kanai berang dek ibuk guru tu. Sampai katiko lulus SD anak urang tu masih tetap bakawan batigo. Tapi dani alah acok kanai tinggaan dek ayu jo linda ko. Bisa di kecek an alah kanai pancia an dek anak urang baduo tu.
Katiko ka mandaftar SMP, dani nio sakolah ka tampek SMP favorit di kota tampek inyo tingga tu, sadangkan ayu nio pulo mandaftar disinan karano inyo ma ikuik an dani. Linda tetap sakola di kampuang nyo, karano ado sakolah SMP di dakek rumah nyo. Karano dani nan punyo onda nyo, ayu manumpang lah jo dani untuak pai mandaftar ka SMP tu. Ruponyo indak di tarimo dek SMP tu do, mungkin alun rasaki nak urang tu. Sahinggo inyo baduo mandaftar di SMP nan ado di dakek rumah linda tu jadinyo. Mako basuo lah nak urang batigo tu baliak, salain sa SMP inyo batigo sakelas pulo. Hari partamo sakola di SMP dani, ayu, jo linda basobok jo kawan baru nan banamo rini. Rini dari sakolah SD nan babeda dari ayu, dani, jo linda. Kini nak urang tu indak sajo batigo lai tapi alah barampek sakawan. Samakin hari dani alah mulai di tingga an baliak dek ayu jo linda. Anak urang baduo tu labiah asiak se bamain jo rini. Akhia nyo dani bakawan jo kawan baru nyo pulo, nan banamo fia jo sari. Dani maraso bakawan samo fia jo sari labiah sanang jo indak ado saliang mamancia an. Sadangkan ayu, linda, jo rini hanyo sabateh manyapo dani sajo lai. Dani indak mam parmasalah kan itu, inyo ma anggap sadoalah kawan ko samo sajo, indak ado nan mambedakan. Hinggo sampai lah di kelas tigo SMP, dani, fia, jo sari alah bapisah pulo. Dani jo fia sakelas, sadangkan sari babeda. Tapi babeda kelas ndak jadi halangan bagi nak urang tu untuak bakawan. Ruponyo dani jo fia sakelas pulo jo ayu, linda, jo rini. Katiko itu hubungan kawan nak urang tu alah mulai dakek baliak. Karano nak urang tu pandai dalam kesenian, inyo diundang dek guru di SMP tu untuak mangikuti lomba manari. Anggota lomba manari ko ado dani, ayu, linda, rini, jo mala. Anak urang balimo tu di latiah untuak manari kreasi nan palatiah nyo urang dari ISI Padang Panjang. Katiko itu tari kreasi nan di baok an dek nak urang tu indak masuak ka tingkat provinsi do, hanyo sampai kabupaten sajo. Tapi nak urang tu di undang dek sakolah SMA untuak manampilkan tari kreasi nyo tu. Akhia nyo lulus lah nak urang tu dari sakolah SMP. Nak urang tu lulus katiko Covid-19 sadang ado di Indonesia. Ujian Nasional pun di tiadokan, nan di beritakan sadoalah siswa/siswi harus libur salamo duo minggu untuak ma hindari tatular nyo Covid-19 tu. Rupo nyo indak cukuik wakatu duo minggu sajo do. Indonesia di lock down dek pemerintah salamo satahun panuah, indak buliah kalua dari rumah, kalua kota, maupun kalua nagari. Sadoalah aktivitas di baranti an katiko itu. Sakolah di adokan sacaro online malalui zoom meeting.
Katiko mandaftar SMA, dani nio mandaftar di SMA favorit pulo samo jo linda. Sadangkan ayu inyo ma ikuik-ikuik an dani jo linda se nyo supayo ayu indak tapisah dari linda. Katiko itu, jarak untuak pai ka sakola SMA ko lumayan jauah dari rumah nak urang batigo tu, sahinggo inyo harus mambaok kandara an ka sakolah. Katiko mandaftar SMA linda indak lulus di SMA favorit itu do, tapi dani ado kemungkinan untuak bisa lulus di SMA tu. Tibo-tibo ayu mangecek ka dani
“Dani, masuak SMA siko se lah wak, bia bisa samo-samo wak liak”
Ayu mangecek jo mamaso dani untuak masuak ka SMA tu, makasuik hati nyo bia inyo bisa samo pai sakolah jo dani, karano dani nan ba onda nyo. Dani manjawek ka ayu
“Caliak lah dulu yu, iko gadang paluang bisa masuak nyo Nampak dek den, bialah den usahokan dulu” jawek si dani ka ayu.
Nampak mungko ayu agak berang ka dani, karano dani ndak ma iyoan kecek nyo.
Hari samakin dakek untuak tahun ajaran baru. Tapi nan dani alum juo manarimo hasil tarimo atau indak nyo di SMA favoritnyo tu lai. Dani lah mulai cameh, akhia nyo dani mancubo mandaftar di SMA nan di daftar an dek ayu jo linda tu. Dani alah ba firasat kalau SMA tu alah pasti se ka manarimo dani nyo, walaupun dani mandaftar alah ka dakek urang mulai sakola tahun ajaran baru. Ayu mangecek ka dani
“Baa nyo? Jadi juo masuak siko kan, pi lah den kecek an ancak di SMA iko se mandaftar lai bia samo wak liak”. Kecek ayu ka dani jo mungko sanang nyo.
“Tapaso iyo iko nan den ambiak lai, lamo bana kalua hasil nyo SMA nan disinan, urang ka masuak sakola pi lai”. Jawek dani ka ayu, karano inyo lah tau baa parangai ayu.
Katiko mandaftar SMA ado lah pilihan awak labiah minat ka IPA atau IPS. Dani mamiliah untuak masuak IPS, karano inyo mangiro ndak cocok rasonyo kalau masuak ka IPA, matematika nyo agak lamah, sadangkan hafalannyo lumayan kuaik. Tibolah ayu jo linda
“Apo ang ambiak kelasnyo dan? IPA atau IPS?” kecek linda ka dani.
“IPS den ambiak linda a, ang apo ambiak?” jawek dani ka linda.
“Den ambiak IPA lah dan, den suko jo matematika, kok ang apo ambiak yu?” tanyo linda ka ayu.
“Weh den ambiak IPS lah, bia samo jo dani ciek lu, den ka samo jo dani taruih, nak dan!”. Jawek ayu ka dani jo linda.
Katiko awal masuak sakola SMA tu lah dani alah mulai risiah jo ayu. Otomatis linda lah babeda kelas jo nak urang baduo tu, sahinggo manyabek an dani jo ayu alah jarang basobok linda, karano kelas IPS jo IPA jauah jaraknyo. Katiko kelas satu SMA rupo nyo dani jo ayu ko salokal baduo, indak manyangko dani kalau akan salokal pulo jo ayu do. Katiko itu masih maso Covid-19, tapi alah mulai bakurang, urang sa Indonesia di wajibkan mamakai masker, ndak buliah barinteraksi, harus mambaok handsanitizer satiok saat. Jadi di sakola SMA namo nyo sift satu jo sift duo, wakatu baraja nyo hanyo babarapo jam sajo. Dapeklah dek dani sift satu, sadangkan ayu sift duo. Otomatis bapisah lah nak urang baduo tu katiko masuak sakola. Dani pai sakola surang mambaok onda nyo, sadangkan ayu ndak punyo onda do, inyo di antakan dek gaek nyo pai sakola. Katiko sakola tu dani basobok jo kawan-kawan baru nyo nan banamo lia, tri, yola, jo alma. Nak urang balimo ko, alah manjadi kawan dakek pulo di SMA, bisa di kecek an dek anak jaman kini mambuek “Circle” pulo ciek. Ayu indak sanang dek mancaliak dani alah ba kawan baru di kelas sift satu nyo tu, sadangkan ayu alum dapek kawan jo sia-sia lai do. Alah satahun pulo balalu sakola mamakai sift tu, naiak lah dani jo ayu ka kelas duo SMA lai. Wakatu kelas duo tu lai indak mamakai sistem sift lai do, tapi wakatu barajonyo pendek nyo. Bagabuah lah anak sift satu jo sift duo lai manjadi ciek kelas. Dani alah akrab jo kawan-kawan barunyo alah batambah pulo kawannyo baduo urang lai, reva jo ane. Alah batujuah kini nak urang tu mambuek Circle. Tibolah ayu jo muko kurang suko nyo ka dani mangecek an
“Rami ang bakawan ma dan, ndak ang ajak den do? Sato den ciek a, buliah nak balapan wak ndak ganjil nyo jadi do, bisa baduo-duo”. Kecek ayu ka dani
Dek dani lah ibo mancaliak ayu ko surang se, mako di ajaklah bakawan jo kawan baru nyo tadi dek dani. Kawan-kawannyo tu pun sanang kalau batambah kawannyo surang lai.
“Nakrang, ko den ado kawan ciek lai a, kenalan lah kawan den ayu namonyo, nyo samo sakola jo den dari SD jo SMP ma, rumah nyo pun dakek jo den nyo”. Kecek dani ma ngenal an ayu ka kawan-kawan nyo tu.
Samakin lamo, samakin akrab lah nak urang balapan tu, sampai-sampai dibuek pulo namo geng nyo ciek. Kama-kama taruih ba lapan, indak buliah ado nan tingga surang. Dek alah indak ba sift masuak sakola lai, manumpang lah ayu jo dani pai sakola ko taruih, alah manumpang bajapuik pulo lai dek dani, kok mode kecek urang minang ado lah baso basi awak ka kawan, kok mam basoan pitih mambali minyak bagai, namonyo awak manumpang. Tapi iko indak do, ayu mode urang ka sanang an se, dani nan panek taruih manjapuik manta kan nyo pai jo pulang sakola. Dani pun ibo, namonyo awak ba dunsanak tantu lah batumpang an juo, apolai ayu jo dani ko sasuku, mako dari itu bisa di kecek an badunsanak. Sampai katiko itu ado pulo kajadian, dani mambali tas sakola baru nan bamerek lah, indak lamo sudah itu ayu mambali tas pulo nan sarupo jot as si dani. Disinan dani alah mulai kesal bana jo ayu, kalau pun inyo nio bali tas di tampek itu, manga harus nan sarupo bana jo dani, ado mode jo bantuak tas nan lain nan bisa nyo bali disinan. Mangeceklah kawan-kawan dani nan baranam tadi ka dani
“Weh dani, samo ta sang jo ayu ma, bakok bisa samo? Dima kalian bali? Samo kalian mambali nyo yo?” kecek kawan-kawan dani tadi
“Ndak den nan mamiliah tas ko do ma, kakak den nan mamiliah an, den dibalian dek kakak den, tu den manarimo se nyo. Lagian bia nak bantuak kamba kami dek nyo, nak dan”. Ayu mangecek ka nak urang tu.
Dani alah maraso malu, karano di samo-samo an barang punyo inyo tu, dani ndak suko do, tapi baa lah, dani harus manarimo se jo lapang dado lai. Hari samakin hari, dani dibalian hp baru dek gaek nyo, Nampak pulo dek ayu, ayu mambali pulo hp baru nan sarupo jo dani, sampai akhia nyo hp ayu pacah, marengek nyo ka gaek nyo mintak di balian hp baru nan maha mode Iphone nan dek urang-urang kini tu. Dek amak nyo talampau manuruik an kandak si ayu mako dibalian lah dek amaknyo hp maha tu. Samakin lamo, ayu samakin malunjak, indak hp se nan di mintak nyo lai do, tapi onda baru ciek. Amak nyo tatek ma usahokan kandak anak nyo tu. Sampai-sampai gaek ayu curhat ka gaek si dani
“Bali onda baru wak eh” kecek gaek dani ka gaek ayu
“Iyo ni, ko ayu marengek nak mambali onda baru, nyo sagan manumpang se jo dani taruih pai sakola, kama-kama jo dani juo taruih pi”. Kecek amak ayu
“ Eh, ndak baa do dakek awak nyo mah, biaso nyo tu samo-samo pai sakola tu. Sudah panen padi ni nak?. ” jawek amak dani jo batanyo ka amak ayu
“Iyo ni, lai lah Alhamdulillah banyak hasil e, bisa man dp an onda untuak ayu ciek, tu nan mamintak hp baru bagai”. Jawek amak ayu
“Ba kredit onda baru ni tu?” tanyo amak dani
“Iyo ni, ba ansua tiok bulan ka dealer nyo ba dp se baru nyo ni”. Jawek amak ayu
Dek alah ba onda baru ayu, di baok lah dek ayu ko onda baru ka sakola lai, baajak dani manaiak an onda baru tu. Sampai lah bara hari kamudian, sakiro duo bulan onda tu baru, ado pulo kajadian. Katiko jalan ka pai sakola, dani manumpang jo ayu di onda baru nyo. Nan mambaok onda ayu, dani ba gonceng di balakang. Baru pertengahan ka pai sakola alah tajatuah nak urang baduo ko, dek kancang-kancang ayu mambaok onda, untuang lai indak baa-baa, cuman masuak ka tapi sawah se nak urang tu nyo. Dani lai indak ba, tapi ayu agak tasakik kaki nyo. Alah cayia namo lah onda baru ayu ko.
Alah nak tamek pulo SMA ayu jo dani lai. Alah ado pulo nan namonyo SNBP (Seleksi Nasional Berbasis Prestasi) untuak masuak ka perguruan tinggi. Dani mamiliah ma ambiak jurusan hukum, karano inyo ta inspirasi dari abang nyo
“Dani, apo ang ambiak jurusan?” tanyo ayu
“Den ambiak hukum bia samo jo abang den bisuak” jawek dani
“Weh den ambiak hukum lo lah, bia samo jo ang” kecek ayu
Disinan dani alah mulai lameh pulo baliak ka ayu,
“ka mode iko se ayu ko taruih ko? Den nan seso dek nyo ma” kecek dani dalam hati
Sampai suatu katiko ado lah acara perpisahan SMA ko, mambuek video flashmob namonyo, video anak jaman kini ko. Ayu jo dani tatek pai baduo ka sakola, nan kini masih mamakai onda ayu ko. Tapi badan dani agak kurang sehat inyo sadang salemo jo damam.
“Pindah salemo ang ka den ma dan, salemo lo den dek nyo a, lah ka damam lo den ma”. Kecek ayu ka dani
Dani anok se nyo, inyo maraso sakik ati alah digituan dek ayu. Sa sampai nyo di sakola, rupo nyo badan ayu ko samakin ndak lamak, indak talok dek nyo lai malanjuik an acara tu.
“Dan, pulang wak lah ndak talok dek badan den lai do a”. kecek ayu ka dani
“Pulang la hang lu yu, den beko bisa numpang jo nak urang baliak”. Jawek dani
“Pulang se lah wak a, ndak talok dek den baok onda do, ang baok onda baliak samo jo den capeklah!”. Kecek ayu
Pulang lah dani jo ayu tu baduo, kini nan mambaok onda dani sampai karumah nyo. Tibo di rumah, dani maraso ndak sanang hati nyo dek alah pulang se, sadangkan kawan-kawan nyo sadang sero-sero jo acara flashmob tu. Pai dani baliak ka sakola SMA tu baliak surang, ndak maajak ayu lai do, karano nyo tau ayu tadi ndak talok lai dek badan nyo. Sampai lah ayu man chat dani
“Woi dan, baliak ang ka skola liak?” tanyo ayu
“Iyo yu a, ndak lamak lo raso dek den do main baliak se dulu”. Jawek dani
Sampai hari ba risuak nyo, dani di diaman dek ayu. Gara-gara masalah itu.
“Yu, lah cegak ang, jo sia ang pai sakola tadi?” tanyo dani
“Surang den pai nyo” jawek ayu singkek
Disinan dani alah mulai marasoan kalau ayu ko sadang berang ka inyo. Dani ndak mambaok panjang masalah do, nan pantiang inyo alah manyapo tadi kecek nyo dalam hati. Sampai ka barisuak hari dani masih sajo di diaman dek ayu.
Tibolah hari dimano siswa/siswi SMA ko mancari kuliah. Kabatulan dani indak di tarimo katiko SNBP tu do. Ayu pun di kabana indak pulo. Dani taruih mancubo sampai ka SNBT (Seleksi Nasional Berbasis Tes) rupo nyo indak juo lolos do. Baitu pun jo ayu.
“Lai lolos dani ni?” tanyo amak ayu
“Tulah indak do ni a, rancana kok indak juo ujian mandiri lolos ka masuak swasta se lai” jawek amak dani
“Ha iyo ayu rencana baitu pulo, linda nan santiang se ndak lolos nyo negri do” kecek amak ayu
“Kaba-kaba nyo linda ko gepyear ni kecek amak nyo ka wak” jawek amak dani
Alah masuak pulo dani ka ujian SIMA (Seleksi Mandiri). Alhamdulillah alah lolos dani kini. Alah kuliah inyo di perguruan tinggi negeri, walaupun indak jo jurusan impiannyo dulu. Sadangkan ayu, inyo masuak ka swasta. Sampai kini, alah batahun-tahun lamo nyo indak pernah dani jo ayu saliang sapo lai. Walaupun linda gepyear, saba nyo manunggu bia bisa masuak perguruan tinggi negeri, dek buah ka sabarannyo akhia nyo masuak pulo inyo ka perguruan tinggi negri, bebeda jo ayu nan swasta.
