Hilangnyo Peran Mamak

Oleh : Nabila Zahara,  Mahasiswa Universitas Andalas

Di Minangkabau panggilan mamak di tujuan kapado saudara laki-laki dari mandeh. Dalam Minangkabau ko mamak mampunyoi kadudukan nan pantiang tarutamo dalam sistem kakaluargaan matrilineal. Mamak baperan dalam mangurus harto pusako jo mambimbiang kamanakannyo. Tapi nan denai rasoan indak ado nampak peran mamak ko kini lai.

Salamo denai hiduik bisa dihituang bara kalinyo mamak ko karumah mancalik kamanakannyo. Jan kan untuk maagiah pitiah balanjo, sakedar mancalik keadaan se indak ado do. Batanyo baa sakolah kini, lai sehat-sehat se atau tentang apo lah, indak pernah!. Jadi dima latak peran nan katonyo kamanakan di bimbiang ko kini?. Kadang denai mikia apo nan salah dari denai sabagai kamanakannyo jo apo ado salah dari rang tuo denai. 

Sakitar sabulan nan lalu denai baru mangatahui kalau mandeh denai dulu sabalun denai lahia, pernah di sodokan pisau ka badannyo dek  mamak denai nan paliang gadang. Dek gara-gara mamak ko nio manggadaian oto angkot nan jadi modal ayah denai mancari razaki untuk anak bininyo sahari-hari. Angkot ko di balian dek abak(kakek) denai untuak mandeh jo ayah denai. Karano ayah denai ko bisa baok oto dan diagiah lah modal. 

Bakato abak denai “ko oto untuak kau daih, laki kau bisa baok oto baok lah oto ko untuak pai manambang.” 

Si mamak denai ko ndak tarimo do. Iyo batua ayahnyo nan mambali. Tapi bukan bararti inyo bisa maambik jadi hak milik inyo, bahkan untuak dijua pun indak buliah subananyo. Kalo untuak mamakai indak ka dilarang gai do. Tapi apo nan tajadi?, katiko abang-abang jo kakak-kakak denai pai sakolah ayah pai manambang pulo, mamak ko tibo karumah dituruiknyo mandeh denai sambia di sodokan nyo pisau ka badan mandeh denai. Sambia bakato..

“Ma bpkb oto?”

Mandeh denai ndak bisa mangecek lai, mandeh denai hanyo diam sambia bajalan ka dalam bilik untuak maambik surek oto tu. Katiko alah di agiahan surek tadi mamak ko langsuang pai. Alah pulang akak denai sakolah langsuang dicaritoannyo ka akak denai. Kironyo bpkb oto ko di gadaiannyo indak lamo do oto ko alah diambiak dek urang. Oto indak ado lai tapi alhamdulillah ado urang nan manawaran untuak makai otonyo pai manambang walaupun hasilnyo beko dibagi ka urang nan punyo oto dilua pitih minyak oto tu. Saindaknyo ado lah ayah denai mambaok pitih untuk anak bininyo dirumah walaupun sayuik-sayuik sampai. Dek oto tu alah di ambik urang, Mandeh denai saba se nyo indak ado nyo manuntuik apopun. Berang ka udanyo(abang), indak basapoan? Indak ado di lakuan dek mandeh denai do. Sampai denai alah sma pun denai mancalik mamak denai tu lai bahubungan elok jo kaluarga denainyo. Katiko mangatahui carito ko hati denai sungguah sakik mandanganyo, tadiam denai mandanganyo. Kok ado urang nan mode itu yo. Denai kiro mamak denai nan paliang gadang ko emang elok dari dulu ka mandeh denai. Denai bapikia mode tu karano denai mancalik inyo jo mandeh denai dakek Apolai mandeh denai adiak nan dibawah inyo bana. Nyatonyo sakejam itunyo dulu, sungguah denai indak manyangko do. 

Karano tau carito ko bamikia lah denai, baa kok indak berang mandeh denai ka mamak ko? Baa kok mandeh denai takuik ka mamak denai ko, indak ka abangnyo se do bahkan ka adiaknyo nan laki-laki inyo takuik lo. Kalo ado mambahas apopun jo mamak ko mandeh denai pasti manangiah dan inyo indak talok malawan do. Mungkin dek gara-gara kajadian tu mambuek mandeh denai trauma jo takuik ka sanak laki-lakinyo ko.

Ado lo mamak denai nan paliang ketek pulang dari rantau pai karumah denai maminjam onda. Indak baliak-baliak nyo do, Apo nan tajadi? Kironyo onda tu dijuanyo. pitih manjua onda tu digunoannyo untuak nikah di rantau urang. Berang mandeh denai? Indak, salamo denai hiduik indak pernah denai mancalik mandeh bamusuhan jo sanak laki-lakinyo ko. Padahal onda tu paguno untuak Bali jaga kapasa pagi, untuak pai sakolah gai. Onda ko tabali dek jariah payah rang tuo denai, tibo-tibo se mamak ko maambiaknyo. Indak ado mamak ko mamikian baa kamanakannyo. Carito iko pun denai baru tau lo. Salamo ko denai mamandang inyo jo pikiran nan elok-elok senyo, nyatonyo samo senyo.

Denai ingek bana katiko mandeh denai bolak balik masuk rumah sakik. Indak ado mamak tu tibo mancalik do. Sanak padusinyo nan sainduak sabapak, nan tampek baiyopun bisa di hituang bara kali pai manjanguak ka rumah sakiknyo. Itupun dek karano diajak dek etek-etek denai nan indak sadarah jo mandeh denai, katiko dirumah sakik pun etek denai ko mode jo urang jauh. Saharusnyo inyo nan manungguan akaknyo dirumah sakik, ko indak tibo mode jadi tamu bana, mode jo urang lain. Padahal mandeh denai alah banyak mangaleh untuak inyo. Jan kan mamak nan tibo mancalik, etek denai bana bisa dihituang bara kalinyo tibo nyo. Ampiang satiok duo bulan sakali mandeh denai di rawat rumah sakik lai.

Indak di maso-maso dulu se do, sampai kini pun mode itu yo sipaik mamak tunyo.
Jan kan manolong kamanakannyo malahan inyo nan mintak tolong ka kamanakannyo. Alah indak manolong mahabisan lo tu. Apo nan dihabisannyo? Harato pusako tinggi di jua nyo.

Ado sakatiko mamak-mamak ko pulang dari rantau untuak marapekan pitih kontrakan jo kontrak tower. Disitu mandeh denai di elok-elokannyo, diagiah bagai pitih kontrakan tu padahal sabalun-sabalunnyo mandeh denai indak di agiah do padahal kontrakan tu dibangun dek abak(kakek) denai. Indak sampai disitu sajo do, mandeh denai di antaan nyo bagai ka rumah sakik untuk cek ginjal kalo harus cuci darah, jalani se keceknyo. Ingek bana denai nan baru masuk mtsn alun tau tentang urusan rumah sakik, tapi katiko tu harus denai bisaan surang. Apo guno mamak dirumah sakik tu? Manunggu di lua senyo. Denai nan bolak balik maurus surek manyurek. 

Salamo kurang labiah duo tahun mandeh denai cuci darah indak pernah! Catat indak pernah! mamak tu nan mangawanan mandeh denai karumah sakik do jo sanak padusinyo gai indak pernah do. Ado mamak denai nan kayo ko satioknyo ka padang pasti singgah karumah manjapuik amak(nenek) denai untuak pai makan atau sekedar baok raun sabanta se tapi indak pernah inyo maajak mandeh denai do. Pernah lah wakatu tu mandeh denai mintak ikuik, Apo jawek mamak nan kayo tu?,

“Anak uni ado mah, pai lah jo anak uni”.

Denai dek masi manghargoi inyo, denai anok senyo. Padahal disitu denai sakik hati bana. 
Dalam hati denai..
“Kok itu indak usah sabuik, kami sabagai anak lai pandai baa caro mambahagian rang gaek nyo. Tanpa di suruh pun kami lai lo mambaok rang gaek kami untuk pai sanang-sanangnyo. Tapi mandeh denai ko nio lo marasoan pai jo adiaknyo. Baa kok sagitu bana katonyo nan kalua. Sakali ko mandeh denai mintak painyo”.

Samanjak tu indak pernah mandeh denai mintak ikuik kalo mamak ko maajak amak pai do. Tapi wakatu tu antah baa ko lah tibo-tibo se mandeh denai mintak ikuik mungkin nyo lupo jo kejadian nan dulu. Tapi nan kini ko lai dibulihan ikuik, pai lah mandeh denai jo akak denai gai. Tibo dirumah akak denai carito sambia berang-berang. 

“Bisuk ko indak usah Ama mintak ikuik jo uniang tu, cukuik sakali ko se. Awak lai kayo tapi piliak ka sanak surang. Maso Iyo pas makan tadi samba kan banyak talatak tu, tapi di kecekannyo jan esek nan lain. Kok lauk nan iko se ambiak, samba-samba nan lain pun dijauhannyo bia indak di esek samba tu. Parah bananyo, salamo ko kok pai makan jo uda atau jo unang indak pernah mode itu do. Malah habis bana samba tu sadolahnyo dek kami indak adonyo mangecek-mangecek do. Gitu kironyo sipaik mamak nan kayo tu”. Ciek lai, kalo pulang ka Padang pasti mamak ko lalok di hotel taruih indak pernah gai lalok dirumah rang gaeknyo do. Antah kok karano rumah ko buruak indak nio nyo. Padahal kan subananyo rumah tuo ko tampek awak ba pulang, tapi baa lai mamak ko indak mamak urang Minang do.

Lanjuik, sakitar 3 bulan sabalun mandeh denai maningga. Katiko salah surang mamak denai ko karumah, bakato lah mandeh denai..

“Bisuk ko kalo lah kalua pitih kontrak tu pelokan rumah ambo yo, tuka kaconyo kaco alah banyak nan pacah, tu tinggian rumah ko”

Dijawek lah dek mamak denai ko

“Jadih ni, bisuk ko di pelokan rumah uni tanang se lah uni”

Mandeh denai nan mandanga itu tanang lah inyo. Mungkin mandeh denai tu alah maraso inyo kapai jadi ibaraiknyo panyampaian pamintaan nan tarakhir mandeh denai itu ka mamak-mamak denai ko.

Tapi nyatoko indak lamo satalah mandeh denai ko pai, pitih ko kalua dapek kaba lah denai jo akak denai kironyo pitih tu digunoan untuk mampelokan rumah adiak mandeh(etek) denai. Mandanga kaba tu, langsuang lah akak denai manelfon mamak denai nan dakek jo etek denai ko.

Sambia manangih akak denai mangecek

“Dapek kaba wak om pitih kontrak lah kalua”
“Iyo yel, pitih tu digunoan untuak mampelokan rumah unin, rumah unin dapuanyo alah roboh” jawek mamak ko

“Baa kok rumah unin jadinyo tu om? Bukannyo patang tu pas Ama mangecek untuk pelokan rumah ama tu om samo mamak-mamak nan lain maiyoan. Mandanga itu sanang hati Ama kami om. Karano salamo ama hiduik iko nan tasabuik dek Ama nyo om nan lain indak ado kok mamintak indak ado Ama do. Rumah kami labiah parah dapuonyo mah om emang indak bisa dipakai lai. Iko dek Ama lo nan mamintak om dan om maiyoan. Kalo indak Ama kami nanmangecek indak ka sasakik iko kami rasoan do om.”

Apo nan jawek mamak denai ko? Sungguh indak ado dalam pikiran denai do inyo ka manjawek itu.

“Iyo wakatu tu Ama iyel dek sakik dari pado tapikian lo itu beko dek Ama tu”.

Tambah sakik lah hati kami mandanganyo

“Ba ota se Ama kami om, gitu bana om ka Ama kami, taraso diasiangan bana kami rasonyo alah induak indak ado, kironyo nan mamak mode iko lo”. Jawek akak denai sambia manangih.

“Baa kok mode itu kecek iyel indak yel hargoi om sabagai mamak do”.

“Baa kami ka manghargoi om, om se mode itu ka kami”.

Mamak denai ko masi mangecek ditelfon, tapi indak di dangaan dek akak denai langsuang se telfon tu di matiannyo. Karano masalah iko manelfon lah mamak ko ka uda denai

Disabuiknyo “baa kok mode itu iyel mangecek tu ndi, indak ado di hargoi nyo om do, tolong lah kecekan ka inyo”

Jo santai nyo uda denai ko manjawek “alah batua iyel tu mah om, harusnyo om nan maajaan inyo gai mah om, tapi Apo pernah om? Itu lo nan taraso dek adiak wak tu mah om”.

Wakatu mandeh denai maningga ingek bana denai bakato di mungko kuburan mandeh denai ko. 

“Ama lah pai, katiko ado ama lai indak ado nan datang Apo lai Ama lah indak ado. Jo sia kami badunsanak lai”. 

Di jawek nyo dek mamak denai ko sambia mambimbiang denai untuak pulang karumah
 “ado uwonyo ikhlasan ama pai”. 

Tapi nyato nyo kato “ado uwo” tu indak ado do, Itu hanyo sakedar ucapan. Sampai kini Mamak denai ko kalo pai karumah cuman untuk maurus surek-surek tanah samo kalo nio minjam oto. Jadi ndak ado arti katonyo ka denai wakatu tu do. Karumah pun indak lo ado mananyo baa denai do, baa kuliah kini. Malahan inyo mancaritoan anak e nyo, anaknyo nan karajo disiko lah, anaknyo nan iko lulus disiko lah. Denai cuman mangguk-angguk katiko mamak ko bacarito sambia malamun denai mandanganyo. 

Indak lamo siap pitih kontrak tu kalua, tibo lo lah masonyo pitih tower ko nan kalua lai. Denai jo akak, abg denai mandapek kaba talambek dari nan lain. Tibo-tibo mamak nan paliang tuo nan tingga lai ko, manelfon uda denai untuak manjapuik pitih bagian Ama denai karumahnyo. Padahal rumah tuo ado tapi baa kok dirumah urang lain lo transaksinyo. Tapi baa lai mamak ko indak tantu baa adaik Minang ko do padahal kalo bacarito mode nan paliang paham bana baa adaik ko mah. Tapi uda denai ma ikuik senyo.

Di agiah nyo lah pitih 10jt ka uda denai, takajuik uda denai baa kok sagiko dapek, uda denai tau bara nominal kontrak ko karano uda denai jo urang nan ngontrak ko. Tapi baa kok sagitu bagian untuak kami. 

Batanyo lah uda denai 
“baa pembagian nyo ko wo?”

“Pitih tu dapeknyo sagiko, anak amak nan tingga ba 5 urang lai baranam jo amak tapi dek Ama ndi anak padusi tu mangkonyo tetap diagaih.”

“Tapi baa kok iko se dapek jatah Ama ko wo? Sanak padusi wak ado batigo nan jadi pawaris Ama wak tapi baa kok indak adil mode iko wo. Indak ado gai pembagian di Minang kalo nan padusi alah maningga indak ado dapek untuak inyo do, Sadangkan anak padusinyo ado”. Jawek uda denai.

“Iyo mode iko, tadi uwo jo nan lain alah mangecek lo jadi iko bagian Ama ndi nyo”.

“Kok mode itu bia lah indak usah wo, pitih sagitu lai murah mancari e dek awaknyo”. Langsuang pai uda denai dari rumah tu.

Tibo dirumah unang denai di telfonnyo lah denai jo akak denai, bakato uda ko

“Pitih tower alah cair mah, kok ado uwo maagihan pitih kalo 10 juta diagiah e nyo jan ditarimo”.

Sagitu bana mamak-mamak tu yo, indak tapikian deknyo baa kamanakannyo indak ba induak do. Ibaraik basadakah se ka kami nan anak ndk ba induak ko e nyo. Pitih dibagi 6 nyo sudah tu di kaluannyo sagetek surang untuak kami. Bisuak nyo ditamui lah uda denai dek mamak ko. Inyo maagihan pitih sabanyak 25jt, kironyo indak pembagian rato itu do, indak dari pitih etek jo mamak-mamak denai ko nan dipotongnyo do, kironyo pitiah jatah amak denai nan di ambiaknyo untuak panambahnyo. Jadi etek jo mamak-mamak denai tu rato dapeknyo nan untuak panambah jatah Ama denai ko dari pitih amak diambiaknyo. Tapi bia lah nan kami basaba senyo indak ka lamo gai pitih mamak-mamak tu kabatahan tu do sabanta alah habis se dek e tu nyo. 

Samanjak kajadian ko uda denai mangarehan untuak harus ado hitam diateh putiah, pajanjian bahwasannyo kalo ado pambagian-pambagian harus rato dapeknyo lai. Bia indak tajadi nan mode iko lai. Kok tajadi lo baliak bisa di tuntuik mamak tu. Indak lamo sasudah tu mamak-mamak ko manyasakan untuak manjua tanah. Apo nan tajadi ko? Urang Minang atau indak nyo ko?. Dek kareh yo hati mamak ko bialah tanah nan disitu dijuanyo asalkan pitihnyo dibagi rato. Kironyo pas pambagian pitih ko mamak-mamak denai nan dirantau tu pulang. Tapi nan kami indak tau kalonyo pulang do. Kami tau bahwasanyo inyo ka pdang wakatu tu katiko alah baliak lo inyo ka rantau. Inyo pulang hanyo untuak manjapuik pitih, indak tacalik kamanakannyo dek e do. 

Indak habis disitu sajo, tanah nan di tampek lain dibaginyo lo, baa pembagiannyo? Tanah tu dibagi 3 ama denai, etek denai jo amak denai tapi dibawah namo amak denai ko tatulis namo mamak-mamak ko. Katonyo salagi amak masi hiduik masi tetap ateh namo amak, tapi kalo indak ado amak lai baru ka mamak ko lai. Sampai kini mamak ko manyasakan uda denai untuak maurus surek kepemilikannyo untuak Apo tu? Jaleh lah ka dijuanyo karano pitihnyo tu alah habis jadi ka iko nyo baharok bana lai. Sampai bolak balik ka rumah ama denai ko untuak maurus surek tu mah. Nan dek uda denainyo sangajonyo untuak lamo manyiapan surek tu. Nan labiah parahnyo amak denai indak tau gai kalo bahwasannyo tanah nan di sungai lareh tu alah di jua do. Pernah wakatu tu abg denai batanyo ka amak denai ko,

“Mak tanah dirawang tu kaba e ka dijua mak yo batua tu mak?”

Dijawek lah dek amak denai
“Baa lo kok dijua, dulu dek abak(kakek) indak buliah tanah ko dijua do, tanah nan dirawang tu kecek abak untuak endi tu mah karano wendi cucu kasayangannyo”.

Banyak lah abg denai bacarito jo amak. Sadolah pacakapannyo tu direkam dek abg denai dikirimnyo ka uda denai. Dek uda denai di caliakannyo lah ka mamak-mamak ko. Katiko mandanga kato amak tu mamak ko diam senyo, indak pandai manjaweknyo do. 

Baitu lah, urang lain indak tabali tanah deknyo do, nan awak alah ado bajua lo. Tapi itulah mungkin mamak ko takuik indak dapek jadi punyonyo kalo dijua masi bisanyo dapek pitih e. 

Katiko ado acara dirumah ko, nan mamak ko indak ado lo nampak perannyo do. Nan harusnyo mangatoan urang mamak tapi indak ado do, manyambuik tamu nan tibo indak lo do. Inyo tibo mode tamu senyo.

Wakatu mamak denai nan indak basapoan jo akak denai tu maningga, akak denai sampai mangecek 

“Abehan selah di situ kok dibaok ka Padang awak lo nan maurusnyo” 
Tapi katiko siap bakato itu akak denai langsuang mangucap astagfirullah. Mungkin dek alah banyak kami takanai dek mamak ko mangko kayak iko kami ka inyo. Nan denai katiko mandapek kaba, denai ka pai ka kampus untuak ujian tapi denai relaan diri denai ko untuak indak ikuik ujian, denai hubungi dosen supaya bisa ujian susulan se. Katiko dibaok ka pdang pun etek denai mangarehan untuak di rumah tampek denai tingga ko se abehan, alasan nyo banyak padahal inyo nan paliang dakek samo mamak den ko mah. Kecekan se inyo indak nio ma abehan dirumahnyo, antah kok dek maleh rumah nyo baserak dek nyo beko.
Akhirnyo baa? Nak kamanakan ko yo nan maabehan nyoh? Sampai anak bininyo pun tingga dirumah ko bahari-hari kami basikap elok-elok ka anak bini enyo. Anaknyo sakik denai nan mambaok pai barubek. Walaupun samaso hiduiknyo kami di balakuannyo indak elok. Dulu indak nio pai karumah ko mancalik kamanakannyo, tapi di akhir iduiknyo rumah jo kamanakannyo ko lah nan manyalamaik inyo sampai ka tampek paristirahatan terakhirnyo.

Dari carito ko dapek lah kito pahami. Bahwasannyo peran mamak nan mambimbiang kamanakan, manjago jo mangalola Harto pusako tu indak ado do lai. Mahabisan nan adonyo lai. Antah kok iko hanyo denai nan marasoan atau nan lain marasoan baitu pulo.