Kesibukan Salamo Bulan Ramadhan
Cerpen dalam bahasa minangkabau
Oleh: Mutia Fadillah Mahasiswa Sastra Minangkabau,Universitas Andalas.
Salamo bulan puaso,rutinitas denai bajalan kayak biasonyo meskipun rasonyo maleh karano harus manahan raso lapa dan auih sapanjang hari.Kuliah tetap bajalan kayak biasonyo dan itu yang mambuek denai taraso sangat panek.Puaso ibadah yang mulia,taraso barek katiko dihadapi pado perkuliahan yang sangat padek.Salamo bulan puaso denai hanyo duduk-duduk dirumah sajo dan itu mambuek denai maraso bosan,akhirnyo denai mandapek ide untuk bajualan salamo bulan ramadhon.Meskipun indak sabarapo setidaknyo cukuik untuk manambah-nambah lanjo sajo,denai manggaleh dimuko rumah sajo baduo samo ama denai,disitu denai hanyo manjua kayak sosis,bakso,nugget,pisang coklat,onde-onde,seblak,bihun,minuman es,karupuk kuah,dan ama denai manjua pical sayua.Denai manjua disore hari sabalun babuko dan tutuik dimalam hari sekitar jam 10 malam,setelah barapo hari denai mangaleh alhamdulillah lai banyak urang yang mambali terutama anak-anak ketek yang pai ka surau untuk sholat tarawih dan witir.
Walaupun denai maraso sangat panek setelah kuliah dan puaso mulai taraso tapi keinginan denai untuk menghasilkan pitih tambahan sangatlah sero karano denai alah marasoan mandapek pitih tambahan dari hasil galehan yang denai jua.Kebanyakan yang mambali galehan denai anak-anak ketek yang dakek rumah denai inyo sangatlah rami karano inyo taruih bamain dirumah denai basamo adik ketek denai yang masih umua 6 tahun.Denai maraso sangat sanang karano galehan denai sangat laku dan itu yang mambuek denai taruih samangat untuk manggaleh walaupun badan taraso panek karano paginyo harus pai kuliah.
Hari-hari bajalan dengan rutinitas yang sangat padek,pagi hari pai kuliah,siang harinyo manyiapkan untuk mangaleh dan sore hari mangaleh sampai malam hari.Tetapi denai tetap semangat untuk manjalani rutinitas denai yang padek walaupun sangat panek bagi denai.Di pertengahan bulan puaso denai mandapek kaba dari incim denai yaitu adik ama denai yang kaduo,incim denai tingga di jakarta basamo laki dan kaduo anaknyo karano incim denai ikuik lakinyo yang karajo tatap di jakarta jadi incim denai mamutuihkan untuk tingga di jakarta.Denai mandapek kaba kalau incim denai pulang sabalun urang rayo karano incim denai nio barayo di kampuang halamannyo,denai pun maagih tau samo keluarga denai dan nenek denai bahwasonyo incim denai pulang ka padang,keluarga denai sangat sanang mandanga kaba kalau incim denai pulang.Incim denai pulang pado malam ka 23 samo oto karano kaduo anaknyo takuik untuk naik pesawat,incim denai manampuh perjalanan salamo tigo hari dan pado malam ka 25 incim denai sampai di padang.Incim denai sampai dirumah siap urang buko puaso,hati denai maraso sangat sanang katiko incim denai tibo dirumah,denai langsuang mandukuang anaknyo dan mambaok an barang-barangnyo ka dalam rumah.
Di malam hari tu incim denai pulang mambaok hewan peliharaannyo yaitu kura-kura,incim denai mangaluaan kura-kuranyo dan disitu anak-anak ketek rami mancalik kura-kura incim denai dan anak-anak ketek yang dirumah denai maagih makanan untuk kura-kura disuruh incim denai untuk maagih makanannyo karano inyo alun makan salamo diperjalanan pulang ka padang.Setelah itu denai dan keluarga denai sarato samo incim denai yang baru pulang dari jakarta bacarito lamak dan incim denai mamutuihan kalau inyo tingga salamo sabulan di padang karano inyo akan maadokan acara aqiqah untuk kaduo anak padusinyo.
Salamo incim denai di padang,denai dan keluarga selalu diajak samo laki incim denai untuk pai jalan-jalan atau pai makan-makan dilua.Laki incin denai urangnyo sangat elok,denai dan keluarga selalu dibaoknyo pai kalua katiko siap babuko kami pai jalan-jalan dan mancari makanan untuk dibaok pulang karumah,sampai dirumah denai dan keluarga sarato samo incim denai jo lakinyo kami bacarito-carito lamak sampai malam hari,kami bacarito tentang acara aqiqah untuk kaduo anak gadihnyo yang akan diadokan samo incim denai siap hari rayo.Pado malam takbiran incim denai dan lakinyo maajak untuk babuko dirumah basamo-samo dan masak basamo-samo dirumah denai dan maajak bini dari kakak ama dan incim denai yang ado di lubuk begalung.Denai dan keluarga denai setuju dengan incim denai dan lakinyo,kami mamutuihan untuk mambali bahan-bahan masakan yang akan dimasak untuk buko basamo.Incim denai yang mambali bahan-bahannyo dan denai,ama,incim dan nenek denai mamasak makanan yang akan dimakan untuk babuko basamo.Denai mandapekan tugaa untuk mambuek es jeli,sedangkan incim,ama dan nenek denai mambuek makanan yang akan dimakaj untuk babuko basamo dirumah denai.
Setelah alah siap mambuek makanan dan denai alah siap pulo untuk mambuek es jeli,pado jam 5 sore ante denai tibo dirumah dengan mambaok an cimangko untuk mambuko basamo beko.Akhirnyo magrib tibo dan kami babuko basamo-samo dirumah itu hari yang sangat sanang dan sero karano urang rami dirumah denai dan ado anak-anak ketek dakek rumah denai yang ikuik babuko basamo.Katiko alah siap babuko denai dan keluarga sarato samo anak-anak ketek kami duduk dilua rumah untuk manunggu anak-anak surau takbiran dan pawai obor.Denai dan keluarga maraso sangat sanang mandang takbiran dan mancalik anak-anak surau yang pawai obor,disitu denai dan keluarga maraso terharu mandanga takbiran karano tahun kini bisa rayo lengkap basamo keluarga.
Di pagi harinyo denai dijagoan ama denai untuk sholat subuh dan mandi siap-siap untuk pai sholat rayo,denai pun sholat subuh dan langsuang mandi dan balimau sebelum pai sholat rayo.Sabalun pai sholat rayo denai disuruh mambarasihan rumah samo ama denai dan mangaluan kue-kue rayo untuk tamu yang tibo beko.Denai pun mambarasihan rumah setelah salasai mambarahasihan rumah denai pai sholat rayo basamo etek denai yang dakek rumah karano denai samo ama,nenek dan incim denai sholat rayo ditampek surau atau masajik yang beda.Denai pai basamo etek denai untuk sholat rayo,salasai dari sholat rayo denai pulang karumah untul salim dan maminta maaf kapado urang tuo dan keluarga denai,sasudah dari itu denai makan lontong karano ama denai mambuek lontong.Salasai makan lontong denai pai ka tampek keluarga yang dakek-dakek rumah untuk maminta maaf sekalian basalam rayo dan setelah denai basalam rayo kironyo denai diagihnyo pitih rayo samo keluarga dakek denai.
Pado siang harinyo denai pai ka tampek bako denai basamo ama,apa dan kaduo adik denai.Kami pai duo onda denai samo adik kaduo denai dan ama,apa basamo adik denai yang ketek, Sampainyo di rumah bako denai urang sangat rami dan denai langsuang basalaman samo urang yang ado disitu,ama denai mambaokan kue untuk bako denai.Setelah basalaman denai disuruh samo kakak apa denai untuk makan sate,Akhirnyo denai makan sate basamo-samo.Salasai makan sate denai pai ka tampek kakak apa denai yang paliang tuo untuk basalam rayo dan maminta maaf,denai pai samo adik denai dan kami diagih pitih rayo samo kakak apa denai, sasudah dari tampek kakak apa denai yang paliang tuo denai pun baliak ka tampek kakak denai yang ketek disitu kami bacarito-carito sampai sore hari dan karano hari lah sore denai maajak apa samo ama denai untuk pulang karumah,kami pun pulang karumah dan sampai dirumah urang sangatlah rami karano sanak-sanak ama denai yang jauh tibo karumah denai untuk pai barayo.Disitu denai basalaman samo sanak-sanak ama denai dan banyak yang batanyo ka denai dima denai kuliah dan semester barapo,denai manjawek kalau denai kuliah di Unand(Universitas Andalas) dan denai manjawek kalau denai maambik jurusan sastra minangkabau.Mandanga kato denai sanak ama denai batanyo balik baa kok bisa maambik jurusan sastra minang dan kalau maambik jurusan sastra minang lai bisa dapek karajo tu?.Denai pun manjawek sadolah pertanyaan dari sanak ama denai salasai dari tu denai pun pai ka kamar untuk lalok karano denai maraso panek.
Di hari kedua raya idul fitri denai hanya duduk di rumah sajo karano di hari partamo alah salasai untuk pai barayo ka rumah sanak-sanak keluarga denai.Denai cuma duduk di rumah sambil main samo adik-adik denai dan di hari katigo rayo idul fitri keluarga denai mamasak banyak makanan karano keluarga dari laki incim denai nio datang ka rumah denai untuk pai barayo.Denai dan ama denai mamasak makanan sabalun keluarga laki incim denai tibo.Barapo lamo sudah tu keluarga laki incim denai tibo tapi masakan alun siap karano denai baduo yang mamasak samo ama denai disitu keluarga laki incim denai manolongan ama denai karano keluarga kami alah dakek bana salasai mamasak kami pun makan basamo-samo jo keluarga laki incim denai.Salasai makan denai basalaman samo keluarga laki incim denai dan kami di agih pitih rayo disitu denai agak malu-malu manarimonyo.
Saminggu sudah hari rayo idul fitri denai di ajak pai jalan-jalan samo etek denai ka majunto.Denai pun pai basamo jo adik denai.Kami pai samo oto ka majunto karano yang pai cukuik banyak.Salamo diperjalanan kami menikmati perjalanan yang cukuik jauh dan disitu adik denai urang nyo pamabuk ateh oto karano nyo ndk bisa mancium baun oto.Tapi alhamdulillah nyo adik denai aman-aman aja,sabalun ka majunto kami singgah ka tampek rumah sanak denai yang ado di pasisia.Sampai kami di tampek rumah sanak denai yang di pasisia kami di hidangkan makanan untuk ka dimakan sabalun pai jalan-jalan.Kami pun makan basamo-samo di rumah sanak denai salasai makan kami ma ota-ota sabalun kami pai ka majunto.Lah lamo kami ota akhirnyo kami malanjutkan perjalanan kami ka majunto,perjalanannyo lumayan lamo.Alah satangah jam kamudian kami tibo di majunto disitu kami bafoto-foto karano tampeknyo lumayan rancak.Salasai kami bafoto kami duduk-duduk makan pop mie.Hari lah lumayan sore kami pun pulang ka rumah diperjalanan oto kami mati dan cukuik lamo manunggu maiduiknyo.Alah lamo sudah tu oto nyo iduik dan kami pun pulang ka rumah dan sampai di rumah pado malam hari.
Duo minggu sudah hari rayo idul fitri incim denai manyiapkan barang dan mulai mambarasihan rumah karano duo minggu lai acara aqiqah kaduo anaknyo.Incim denai alah mulai ma undang urang-urang kampuang dan kawan-kawannyo.Denai pun disuruh ma undang kawan-kawan denai untuk tibo di acara aqiqah anaknyo karano malamnyo kami bamain kim.Saminggu manjalang aqiqah anaknyo incim denai pai manuka bahan-bahan ka pasa dan kami manolongan barasihan rumah dan mambukak bawang atau bahan-bahan yang lainnyo.Limo hari manjalang acara urang alah mulai mamasang tenda di rumah denai dan urang-urang yang ado di rumah denai sangat rami karano urang banyak yang manolongan. Duo hari sabalun acara urang-urang kampuang dan urang dakek rumah pai ka rumah untuk manolong mamasak randang dan manggoreng makanan,disitu denai ikuik manolongan urang-urang yang lagi karajo pado malam malam harinyo kami banyanyi basamo-samo karano urang sangat rami.Denai ikuik pulo banyanyi dan sambil bamain-main basamo kaduo anak incim denai dan adik-adik denai.
Tibo di hari acaranyo denai pun siap-siap untuk mandi tapi karano urang rami di dapua akhirnyo denai mamutuihan untuk numpang mandi di rumah akak laundry yang ngontrak samo incim denai karano wc nyo yang dipakai untuk tamu-tamu yang lain.Sudah denai mandi denai pai ba makeup samo acik denai yang pandai bana makeup.Denai di makeupan nyo dan hasilnya sangat rancak,sudah makeup denai pun siap-siap pakai jilbab dan disitu denai manolongan incim denai untuk manyiapkan anak-anaknyo.Salasai dari itu denai pun duduk untuk manunggu tamu-tamu yang lain di sore harinyo denai samo keluarga denai yang lain banyanyi basamo-samo disitu sangat sero karano bisa bakumpua basamo keluarga besar di hari yang bahagia.
Pado malam harinyo acara kim nio ka mulai disitu denai maminta kartu kim samo apa dan om denai untuk denai bagikan samo kawan denai.Denai alah manunggu kawan denai tapi alun tibo di malam hari tu urang-urang sangat rami bana yang tibo karumah denai dek gara-gara raminyo untuk lewat pun susah.Alah cukuik denai manunggu akhirnyo kawan-kawan denai tibo dan langsuang denai bagikan kartu kim nyo dan kawan-kawan menikmati bamain kim basamo-samo dan disitu denai menghidangkan gorengan dan aia minum.Ado beberapa kawan denai yang nio makan dan disitu denai maambik an nyo makanan, salasai dari itu denai dan kawan-kawan denai lanjut menikmati bamain kim dan urang-urang kampuang makin banyak yang tibo.Acara pun balangsuang sampai malam sudah acara kim kawan-kawan denai pun pulang ka kosnyo masing-masing dan denai pun pai untuk lalok karano alah maraso panek. Bisuk paginyo ante denai mambuek nasi goreng dan disitu denai basamo jo etek dan anak-anak mamak denai makan dan salasai makan denai basamo anak-anak mamak dan etek denai mambarasihan yang ado di lua kami mangumpuan kotak-kotak aia minum dan kardus yang baserakan dilua rumah.Itu hari yang sangat menyenangkan bagi denai dari awal puaso sampai hari aqiqah anak incim denai.
Disiko denai saketek bacarito tentang panggilan denai dirumah,denai banamo mutia fadillah panggilan denai mutia,tapi dikeluarga denai ataupun urang dakek rumah denai maimbau denai dengan namo "ipah" kok bisa denai di panggia ipah? jadi caritonyo waktu denai ketek dulu ama samo apa denai maagih denai namo yaitu mutia fadillah karano nenek denai yang maimbau denai dengan sebutan "fadillah"karano itu panjang bana dan mambuek nenek denai susah maimbau jadi nenek denai maimbau dengan singkatan namo "fah" sejak itulah urang maimbau denai jo sebutan "pah" manjadi "ipah" dan akhirnyo sebutan sampai ka kawan sd denai,akhirnyo kawan sd denai maimbau denai dengan sebutan "ipah".Tapi katiko denai kelas smp dan sma kawan denai maimbau denai dengan sebutan "mutia".Itulah baa denai diimbau dengan sebutan "ipah".
