Cerpen Minangkabau: BINGIK

Di Minangkabau, adolah sabuah kampuang, kampuang banamo kampuang baru. Di dalam kampuang ado ciek rumah tuo,  rumah bawarna puda, nan identik jo paga basi nan kalau didorong babunyi kareh yang mambuek gaduah tetangga sekitar. Di sinanlah tingga Incim, surang padusi tuo nan labiah suko mancigok urang dari pado manyapo. 
Denai picayo baso umua mambuek urang labiah pandai jo bijak. Tapi sadolah barubah samanjak mangenal Incim, tetangga sabalah rumah nan suko maurus hiduik urang lain. 
Di kampuang, Incim di sabuik urang "jilatang dalam kampuang" karano inyo mampunyoi sifaik nan buruak, salain itu inyo pun suko bacakak jo urang jiko urang tu labiah sukses dari inyo.
Walaupun umua Incim bisa di kecekan labiah dari 60 tahun, Inyo pun masih sanggup untuk bakarajo, Incim bakarajo di sabuah catering di dalam kampuang dan jikok ado waktu santai Incim manjadi pambantu di rumah dunsanak nyo.
Pagi tu, kayak biaso, Incim duduak di bangku kayu bawarna coklat yang talatak di muko teras rumah nyo, mancaliak kanan kiri sambia manggarutok. Bibia nyo taruih mangecek jikok maliek urang nan indak inyo suko. 
"Ondeh, ka pai kama lo paja tu lai". Kecek Incim jo suaro nan agak nyo lambekan.
Beberapa saat sasudah tu Incim kalua dari rumah nyo, mandorong paga basi yang mampunyoi suaro nan manggaduah untuk pai ka tampek karajo. Incim pai karajo basamo jo kawan kawan samo gadang inyo.
"Lai tau dek etek, tadi anak si Ani sampiang rumah wak, lah pai se nyo pagi". Kecek Incim mamulai kato ka pado kawan nyo.
Dari ma ncim tau? Lai indak pai karajo nyo tu?" Baleh kawan Incim.
"Antah lah yo, sok lo gaya inyo gai, mungkin dek mentang mentang inyo mambali onda baru, inyo bae lo lewat di muko rumah wak." Kato Incim.
"Hahahaha iyo tu ncimm." Jawek kawan Incim.
Etek Ani iyolah urang nan biaso sajo, hanyo sajo etek ani mampunyoi anak padusi ampek urang, tigo dari anak etek ani lulus kuliah di kampus terbaik kota Padang dengan full beasiswa, sedangkan Incim hanyo punyo surang anak laki laki itupun anak nyo indak tau di untuang. Karano hal itu yang mambuek Incim bingik jo kehidupan Etek Ani. 
Di Minangkabau dikenal jo sistem garis keturunan ibu, dahulunyo Incim mampunyoi 4 urang dunsanak padusi, nan mambuek inyo manjadi ongeh dan maraso paliang kayo karano harato pusako jatuah ka tangan inyo, tapi mimpi Incim jo dunsanak nyo hilang karano Allah maha elok, Allah matikan keturunan inyo, 4 urang dunsanak padusi Incim indak ado mampunyo anak, hanyo incim nan mampunyoi anak itupun anak laki laki. Dek mandanga Etek Ani mampunyoi anak padusi ampek urang mambuek Incim ko samakin bingik, takuik harato puaso jatuah ka tangan Etek Ani.
Bisuak hari nyo tadanga lah kaba baso anak katigo etek Ani dapek kuliah di kampus terbaik dan mandapekan beasiswa samo bakcando kakak kakak nyo, Incim pun samakin bingik.
"Awak bansaik, sok bakuliah lo gai, di bayian dek pemerintah lo tu." Manggarutok Incim sambia bajalan surang manuju tampek karajo nyo. Incim malewati rumah etek Ani
"incim, ka pai kama tu" sapo Dika.
Dika iyolah surang guru Bahasa Indonesia, Dika manjadi guru di sabuah sakolah SMP di Kota Padang. Dika, Incim jo Etek Ani adolah tetangga dakek, hanyo sajo Dika Jo Incim samo samo mampunyoi sifaik bingik, inyo baduo bakawan walaupun mampunyoi perbedaan umua nan lumayan jauh.
"Iko ha, ka pai ka tampek catering lai" jawek Incim. 
"Kasikolah dulu ncim" kato si Dika.
Bajalan lah Incim ka arah rumah Dika.
"Lai tau ka? Kalau anak si Ani ko baduo masuk kuliah?" Incim pun mamulai kecek labiah dahulu.
"Alah ncim, lai adoh pitih urang gaek inyo tu, sok kuliah lo gaya nyo" jawek Dika.
"Pemerintah nan mambayian nyo ka, paja jaleh bansaik, bantuak ka iyo lo" baleh Incim.
"Hahaha iyo ncim, sok kayo gaya nyo." Jawek si dika
"Ka incim pai karajo dulu yo." Kato incim, incim pun tagak dan pai maninggaan rumah Dika.
Dika mambukak handphone punyo nyo, dan mambukak aplikasi Facebook untuk mancaritoan kehidupan nyo di dalam Facebook. Karano Dika surang guru Bahasa Indonesia, inyo harus manjadi harga diri nyo di sosial media, dengan bersikap seolah olah inyo adolah urang baik dan bijak. Padahal Dika suko mangomentari hiduik urang dengan caro manulis kato kato di sosial media.
Salah satu kato kato Dika nan inyo buek di Facebook untuk Etek Ani iyolah "tetangga yang tidak pandai mengurus anak nya" Dika manulis kato kato tu disaat inyo baru manikah dan sadang manganduang anak padusi. 
Pado siang hari, kalua anak Etek Ani banamo Siti dari rumah nyo untuk mambarasihan laman rumah, indak singajo batamu jo Incim, dek sifaik bingik Incim ko nyo sarang pulo anak Etek Ani.
"Hoi, kau ndak sa level jo den doh lai jaleh dek kau." Incim tibo tibo manyarang jo kato kato nan kurang aja.
"Manga ncim? Dek apo ncim ko?" Baleh anak Etek Ani, karano takajuik.
"Kau sakolah dari pitih pemerintah nyo, sok lo gaya kau gai, kau ndak level jo den doh lai jaleh dek kau!!!" Jawek Incim, dan tu Incim pai dari rumah Etek Ani jo gaya nan ongeh nyo.
Anak Etek Ani banamo Siti pun indak tarimo dek muncuang Incim nan tibo tibo manyarang inyo hanyo karano masalah kuliah, tapi karano urang kampuang alah tau baa muncuang Incim jadi kito hanyo harus saba. 
Karano sifaik bingik Incim manjadi manjadi, Etek Ani pun Baniek untuk mamaga rumah, bia indak adoh pagaduhan dari Dika jo Incim tadi.
Etek Ani pun mambali bahan bangunan untuk paga rumah, dan waktu untuk mamaga rumah pun tibo, tukang di imbau dan tajadilah hal nan indak di inginkan.
"Hoi, lai indak kanai jalan ko?" Incim pun tibo tibo mandangkan rumah Etek Ani, baniek untuk manyarang Etek Ani.
"Indak Ncim" jawek pak tukang, pak tukang masih urang kampuang tu juo, jadi alah tau baso Incim tu urang nyo mode apo.
Mandanga kato tu Incim pun pai dari rumah Etek Ani, Incim pai ka rumah kawan nyo untuk bagunjiang. Incim duduak dan memulai kato
"Ondeh, lah nyo pasang lo paga tinggih dek Si Ani ko, awak bansek sok mampunyoi paga tinggih lo bagai." Incim mangecek jo nada sombong.
"Incim, baru tibo lah berang sakali, ado apotu" jawek Rini, kawan dari Incim.
"Ko Rini a, Si Ani tu a, lah jaleh bansek sok nio mambuek paga tinggih lo bagai." Baleh Incim.
"Iyo ncim? Lai ndak ta ampang jalan tu, tinggih lo nyo buek paga." Baleh Rini.
"Iyoo, ma halangan jalan sajo!" Baleh Incim
Ndak sangajo kawan Etek Ani mandanga gunjiangan tu. Nyo sanggah lah kato dari Incim jo Rini tadi.
"Oi Rini, kau caliak lah ka rumah Etek Ani tu, ndak adoh gai kanai jalan doh, jan bagunjiang taruih se pangana kau tu, ma urus hiduik urang sajo karajo kau!" Kawan Etek Ani mangecek jo nada berang, nan mambuek Rini jo Incim tadi tadiam.
Di dunia nan lueh ko, baa harus batamu jo urang nan mampunyoi sifaik bingik mode ko? Apopun nan di karajoan dek Etek Ani dan keluarga Etek Ani tetap manjadi buah gunjiangan dek Incim. Dahulu urang gaek Incim nan mampunyoi sifaik takah iko, kini turun ka anaknyo, bak kato urang "buah jatuah ndak jauah dari batangnyo" ibarat kato parangai anak ndak jauh dari parangai induak nyo. 
Bulan puaso pun bisuak ka tibo, urang basiap siap untuak mangarajoan sholat tarawih partamo.
Suasana malam dirumah Etek Ani
"Maa uni jo adik nio pai sumbayang tarawih ma." anak Etek Ani mamintak izin untuk pai ka surau jo Mande nyo.
"Yolah nak elok elok dijalan." Baleh Etek Ani.
Di jalan ka pai ka surau indak singajo anak Etek Ani batamu Incim di karano jalan ka surau harus malewatan rumah Incim. Incim nan indak niek pai sumbayang tarawih manjadi nio pai sumbayang bia bisa maikuikan anak Etek Ani.
Hari hari pun balalu, rayo ka ampiang tibo urang kampuang sibuk mambarasihan rumah, mancat rumah dan lain sabagainyo.
Rayo kini Etek Ani nio mancat rumah, rumah di cat sabaliak, nampak dek Incim ko dan inyo sibuk manyindia nyindia Etek Ani jo anak nyo.
"Karajo alun dapek lai, lah man cat rumah lo paja ko, dasar sok kayo." Incim mangecek dengan nada kareh dan emang nio mancari cari masalah.
Antah baa, satiok mancaliak Incim rasonyo sakik hati sajo, karano Incim indak pernah bapikia sabalum mangecek dan inyo pun indak punyo kesadaran diri atas parangai nyo nan manyakikan hati urang. Kalau hanyo perihal bingik, untuk apo ka di bingikan? Umua lah tuo juo, ibadah dipabanyak, dan untuk kini zaman lah modern indak adoh urang nan takah itu parangai nyo lai, itu pamikiran buruak.
 Etek Ani dahulu pernah sakik dan Etek Ani di rawat di rumah sakik. Sapulang dari rumah sakik, tampak lah dek Incim baso Etek Ani baru pulang dari rumah sakik, dek Incim busuk hati, incim pun dengan singajo mambaka sarok daun nan masih basah di balakang rumah Etek Ani bia Etek Ani samakin sakik. Untuang sajo Etek Ani jo suami nyo pandai ma aja anak, anak di aja untuk saba dan indak buliah kurang aja kapado urang lain. Etek Ani jo keluarga hanyo bisa saba atas parangai Incim nan samakin manjadi jadi kurang aja nyo.
Hampia satiok hari Incim jo Dika batamu hanyo untuk ma urus hiduik Etek Ani jo keluarga nyo. 
Sampai lah tibo maso si Dika malahian anak padusi.
"Lah lahia anak Dika? Apo anak Dika tu?." Incim pun mamulai kecek karano Incim sadang mancaliak Dika.
"Padusi ncim, Alhamdulillah." Baleh Dika.
"Allhamdulilah." Baleh Incim.
"Untuang sajo anak dika padusi, bisa dapek harato pusako, kok indak lah nyo ambihan pusako dek anak si Ani ko ha." Incim mamulai kato baso basi.
"Iyo ncim, Etek Ani ko serakah, anak banyak padusi, katokan sajo nio manandehan pusako." Baleh Dika
Incim jo Dika pun mangecek sambia galak sajadi jadinyo.
Hari hari balalu, anak Dika batambah gadang pulo, dimuko urang Dika elok laku ka anaknyo, anak disayang sayang jo dimanjo manjo sadangkan di balakang urang anak nyo di ariak ariak. Tapi kalau di sosial media inyo barubah manjadi ibu elok laku, karano Dika mampunyoi sifaik bingik pulo sarupo Incim, Dika pun mambuek status Facebook, hal yang wajib inyo karajoan.
"Anak zaman sekarang tidak boleh di kasi handphone"
Dika mambuek status sarupo itu karano anak ka ampek Etek Ani pas masih ketek di agiah handphone. 
Hal itu hanyo pencitraan publik sajo nyo, Dika manjadi mande nan ma agih anak nyo handphone di umua anak nyo nan masih 2 tahun. Dika pun mampunyoi sifaik pilik, pilik kapado anak dan pilik kapado diri sendiri, nan mambuek Dika samakin bingik jo kehidupan Etek Ani adolah Etek Ani satiok hari manyamba untuk keluarga karano laki Etek Ani bakarajo di pasa, Dika manjadi bingik karano inyo pilik mangaluan pitih untuk samba, jikok nampak Etek Ani mambaok samba, Dika masuk ka dalam rumah, mangunci pintu rumah dan mamberangan anak nyo nan masih ketek untuk ma ampehan raso sakik hati nyo.
Beberapa tahun balalu, Incim dikabaan sakik struk karano faktor keturunan keluarga, dahulu ibu jo ayah incim maningga karano struk. Incim indak pandai mangecek lai, hanyo bisa duduk sajo itupun kalau pai kalua inyo manggunoan kursi roda. Incim manyasa dahulu alah jaek bana ka Etek Ani, tabayang dahulu inyo manyingguang Etek Ani, maso Etek Ani sakik dengan singajo e inyo mambaka sarok basah. Tapi nasi lah jadi bubua, ado raso nio mamintak maaf tapi awak lah indak pandai mangecek lai. 
Dika pun bak cando itu, inyo di usia dari rumah nyo karano sifaik buruk nyo itu, Dika ndak pernah baliak ka rumah nyo dan Dika jo Incim indak pernah basobok lai, inyo hanyo batuka kaba lewat sosial madia.
Incim pun maningga karano struk yang nyo derita nyo, sampai akhia hanyat nyo incim ndak pernah mamintak maaf ka Etek Ani dan ka urang nan alah nyo sakikan karano badan lah indak tagok dan muncuang alah indak pandai mangecek.
Pelajaran dari carito ko, untuk dunsanak kasadonyo, jan sampai mampunyoi parangai mode incim nan bingik sajo mancaliak urang sanang, apolai parangai bak cando si  Dika nan dahulu sok pandai ma aja anak kironyo diri inyo indak pandai ma aja anak. Jan pernah ma urus hiduik urang lain nan indak adoh manggaduah hiduik awak dan jan sampai manyakikan hati urang bak kecek pepatah "satajam tajam nyo ladiang labiah tajam muluik manusia" nan mampunyoi makna muncuang manusia labiah padiah jikok mangecek, karano indak dikendalikan elok elok dan indak bapikia sabalum mangecek.

Cerpen oleh : Siti Fatimah, mahasiswa Sastra Minangkabau, Universitas Andalas.